Fylkespolitikarane vil sette Maristigen i Tinn på topp med 13 mill. kroner når pengane til rassikring i Telemark fordelast. Tiltak i Vinje, Seljord og Fyresdal er og høgt prioritert.
Saka blei behandla i fylkeskommunens hovudutval for infrastruktur 12. november. Utvalet følgde fylkesrådmannens og Statens vegvesens innstilling. Det er Samferdsledepartementet som har bedt fylkene lage eit 4-årig handlingsprogram for rassikring på fylkesvegnettet. I NTP 2010-2019 er det lagt til grunn ei årleg løyving til formålet på 500 mill. kroner for heile landet.
Her kan du sjå denne og andre saker hovudutvalet for infrastruktur behandla
Maristigen på topp
Maristigen i Tinn er vurdert som det viktigaste prosjektet på prioriteringslista. Her går det isras eller steinsprang om lag 40 gonger i året. Arbeidet med fjellreinsk har starta i 2009, og det er viktig å fullføre arbeidet med å legge stålnett i 2010. Ved Laupi i Seljord går det og isras og steinsprang om lag 40 gonger i året. Her skal det settast opp spesialtilpassa rasgjerde til 5 mill. kroner. Prosjektet Vårmur 2 i Fyresdal ligg inne på lista med 1,5 mill. kroner til snøskjerm. Her går det snøskred om lag tre gonger i året i 100 m breidde.
Rasoverbygg og nett
Dei nemnde tiltaka er kategorisert som 1. prioritets prosjekt. Til denne gruppa høyrer og restfinansiering av arbeid ved Hamaren i Vinje som alt er ferdig. Prosjekt som får 2. prioritet er Kreppa i Skien med reinsk og nett til 2,5 mill. og Laupi nord i Seljord med brei grøft til 2 mill for å hindre steinsprang og isras. Prosjekt med 3. prioritet er Spiten ved Notodden, Gunnekleivfjorden i Porsgrunn og rasoverbygg ved Maristigen i Tinn. Lågast på prioriteringslista er Skotfossvegen i Skien og rasoverbygg ved Fjågesund.
Tildeling 18. desember
Neste fase i saka er at Vegdiretoratet i neste veke sender alle fylkenes prioriteringar til Samferdsledepartementet. 18. desember skal departementet etter planen sende ut tildelingsbrev til Vegvesenet om fordeling av pengar til rassikringstiltak på fylkesvegnettet i 2010.